Azərbaycanda Qida Təhlükəsizliyi Agentliyinin tabeliyində fəaliyyət göstərən Qida Təhlükəsizliyi İnstitutunun heyvanların identifikasiyası üçün istifadə olunan birkaların satın alınması ilə bağlı 11.02.2025-ci il tarixində keçirilmiş açıq tenderin yekunları açıqlanmışdır. Bu tenderdə "PLASTPROF" Məhdud Məsuliyyətli Cəmiyyət qalib seçilmişdir. MMC ilə 466.690,00 manat mabləğində satınalma müqaviləsinin bağlanılması nəzərdə tutulur.

Qeyd edək ki, bu, Qida Təhlükəsizliyi İnstitutunun "PLASTPROF" MMC ilə ilk əməkdaşlığı deyil. İnstitut 25.07.2024-cü il tarixində xirdabuynuzlu və iribuynuzlu heyvanların identifikasiyası üçün istifadə olunan birkaların satın alınması üzrə 460.200 manat mabləğində satınalma müqaviləsi bağlamışdır.

Tenderin şərtlər toplusuna görə, "Plastprof" MMC İnstitutu 100.000 cüt xirdabuynuzlu heyvanlar üçün nömrələnmiş vizual birka, 350.000 cüt iribuynuzlu heyvanlar üçün isə nömrələnmiş vizual birka ilə təmin etməli olmuştur.

Qida Təhlükəsizliyi İnstitutu həmçinin 23.01.2024-cü ildə "Plastprof" MMC ilə 589.964,6 manata iribuynuzlu heyvanlar üçün nömrələnmiş 500 min cüt vizual birka, atlar və dəvələrin identifikasiyası üçün istifadə olunan 3 min ədəd radiotezlikli nişanlama vasitələri ilə təmin edilməsinə dair satınalma müqaviləsi bağlamışdır.

Göründüyü kimi, Qida Təhlükəsizliyi İnstitutu ötən il "PLASTPROF" MMC ilə ümumi dəyəri 1.050.164 manat olan iki satınalma müqaviləsi bağlamışdır. Hazırda 466.690,00 manat mabləğində bir satınalma müqaviləsinin bağlanılması da gözlənilir.

Məlumat üçün bildirək ki, tenderin qalibi olan "Plastprof" MMC Qida Təhlükəsizliyi İnstitutunun verdiyi müsabiqə elanından cəmi bir ay əvvəl - 3 oktyabr 2023-cü il tarixində dövlət qeydiyatına alınmışdır. Tender müsabiqəsi isə 7 noyabr 2023-cü il tarixində elan olunmuşdur. Nizamnamə kapitalı 10 manat olan MMC-nin hüquqi ünvanı Yasamal rayonu, Nazim Hikmət, ev 26/76, m. 30-da yerləşir. MMC-nin hüquqi nümayəndəsi Şmirov Elməddin Zahir oğludur. MMC-nin ilk qanuni nümayəndəsi Hüseynov Mirhəbib Etibar oğludur.

Qida Təhlükəsizliyi İnstitutu Nazirler Kabinetinin 2023-cü il 30 dekabr tarixli 494 nömrəli Qərarının tələblərini ciddi şəkildə pozmuşdur. Belə ki, keçirilən müsabiqədə maliyyə imkanlarının və oxşar təcrübələrin qiymətləndirilməsinə dair tələblərin müvafiq sahədə peşəkarlığın, təcrübəsinin, maliyyə imkanlarının və ödəmə qabiliyyətinin olmasının tələbləri nəzərdən keçirilməmişdir.

Qeyd edək ki, "Plastprof" MMC qısa müddətdə dövlət qeydiyyatına alınmasına baxmayaraq Kənd Təsərrüfatı Nazirliyinə tabeli Üzümçülük və Şərabçılıq Elmi-Tədqiqat İnstitutu ilə dərman, sarğı ləvazimatları və materiallarının satın alınması, həmçinin bioloji aktivlərin alınması üzrə iki müqavilə bağlamışdır. Aqrar Xidmətlər Agentliyinin tabeliyində olan Laboratoriya, Ekspertiza və Sertifikatlaşdırma Mərkəzi üçün pestisid və gübrələrin satın alınması üzrə 126.357,79 manat mabləğində müqavilələr imzalanmışdır.

MMC ötən ilin dekabrında "Naxçıvan Aqrar Xidmətlər Mərkəzi" publik hüquqi şəxsi ilə xüsusi təhlükəli heyvan xəstəliklərinin profilaktikası, diaqnostikası, müalicəsi və ləğvi məqsədilə vaksinlərin satın alınması üzrə 797.614,96 manat mabləğində müqavilə imzalamışdır. "Azərbaycan Yaşıllaşdırma və Landsaft Quruluşu" Açıq Səhmdar Cəmiyyəti ilə ting və toxumların yetişdirilməsi, salınmış yaşıllara düzgün agro texniki qulluq göstərilməsi üçün tələb olunan gübrələrin və dərman preparatlarının satın alınması üzrə 99.938,1 manat mabləğində müqavilə bağlamışdır.

Göründüyü kimi, "Plastprof" MMC ayrı-ayrı dövlət qurumlarının keçirdiyi müxtəlifsatın almaların qalibi olmuşdur. Maraqlıdır ki, Qida Təhlükəsizliyi İnstitutunu rəsmi veb-saytı və hətta sosial şəbəkə hesabı olmayan bu şirkətlə əməkdaşlığa sövq edən nədir?

Qalib şirkət haqqında yeganə məlumat odur ki, MMC-nin qanuni nümayəndəsi Şmirov Elməddin Zahir oğlu 20 Noyabr 2023-cü il tarixində Nərimanov rayonu, İsləsgər Qaibov ev 12, m. 1222 ünvanında dövlət qeydiyyatına alınan "Optimus Auto" MMC (VÖEN - 1506599781) adlı şirkətin də qanuni nümayəndəsidir.

Qida Təhlükəsizliyi İnstitutunun direktoru isə Əli Nəbiyevdir. O, 1993-cü ildən Bakı şəhərində anadan olmuş, Bakı Dövlət Universitetini hüquq ixtisası üzrə bitirmişdir. Əli Nəbiyev ədliyyə Nazirliyində, "Azərbaycan Dəmir Yolları" QSC-də müxtəlif vəzifələrdə çalışmışdır. 21 iyul 2023-cü ildən Azərbaycan Respublikasının Qida Təhlükəsizliyi Agentliyinin sədri tərəfindən Azərbaycan Respublikasının Qida Təhlükəsizliyi Agentliyinin tabeliyində Azərbaycan Qida Təhlükəsizliyi İnstitutunun publik hüquqi şəxsin İdarə Heyətinin sədri vəzifəsinə təyin edilmişdir.