Bir neçə gün əvvəl Prezident Ilham Əliyevin Dövlət Turizm Agentliyinin sədri Fuad Nagiyevə sərt töhmət verməsi ölkə gündəmini zəbt etdi. Bu hadisədən sonra media, Turizm Agentliyinin "Transparency International" təşkilatında işləməsi və ya bu təşkilatla əməkdaşlıq edən şəxslərin yuvasına çevrildiyi haqqında məlumatlar yaydı. Məlumatlarda Fuad Nagiyevin ətrafında olanların davamlı şəkildə xidmət məlumatlarını müxtəsil təşkilatlara, şəxslərə sızdırması, hətta dövlət orqanları arasında daxili yazışmaları xarici ölkələrin Azərbaycandakı səfirliklərinə ötürməsi iddia olunurdu.
Ardınca, qurumda çalışan bir neçə nəfərin vəzifəsindən azad edilməsi və Fuad Nagiyevlə yanaşı bir sıra şəxslərin də istintaqa cəlb edilməsi ilə bağlı məlumatların yayılması, onun bu töhmətdən asanlıqla yaxa qurtara bilməyəcəyinə işarədir.
İstintaq zamanı Fuad Nagiyevin işində daha hansı nöqsanların üzə çıxa biləcəyinə dair suallar yaranır. 2022-ci ildə Turizm Agentliyi tərəfindən Qubanın Xınalıq kəndindəki qəzalı evlərin bərpasına ayrılan külli miqdarda vəsait haqqında məlumatlar ortaya çıxdı. Həmin araşdırmada “Xınalıq” Dövlət Tarix-Memarlıq və Etnoqrafiya Qoruğunda qəzalı evlərin tamiri üçün “MAQRO CONSTRUCTION” Məhdud Məsuliyyətli Cəmiyyətinin Azərbaycandakı filialı ilə 4,397,618.1 manat məbləğində satınalma müqaviləsi bağlandığı bildirilmişdi. Bu zaman qiymətlərin süni şəkildə şişirdildiyinə dair şübhələr olduğu açıqlandı.
Məlum oldu ki, 2024-cü ildən bitməli olan “Xınalıq və Köç Yolu” Dövlət Tarix-Mədəniyyət və Etnoqrafiya Qoruğunda qəzalı evlərin bərpası üçün “MAQRO CONSTRUCTION” MMC ilə 11.09.2024-cü ildə 2,231,893.91 manat məbləğində yeni müqavilə bağlanıb. Bu, ümumilikdə 6,629,511 manat vəsaitin ayrılması deməkdir ki, bu da Xınalıqda bir qəzalı evin təxminən 150 min manata bərpa olunması anlamına gəlir.
Qeyd edək ki, Turizm Agentliyi 2021-ci ildə də Xınalıq kəndindəki qəzalı evlərin bərpası üçün 8,688,715 manat dəyərində vəsait ayırmışdır. 4 satınalma müqaviləsi bağlanmışdır. Daha əvvəl, 2021-ci ildə Xınalıq Dövlət Tarix-Memarlıq və Etnoqrafiya Qoruğunda qəzalı evlərin bərpası üçün 1,183,023.88 manat məbləğində müqavilə "STAR CONSTRUCTION-12" MMM ilə bağlanmışdır.
Yenə də qeyd olundu ki, Turizm Agentliyi hələ 2021-ci ildən Xınalıq kəndində qəzalı evlərin bərpasına ayrılan vəsaitlər üzrə müxtəlif müqavilələr bağlamışdır. Elektron mediada yayılan məlumatlara görə, 2022-ci ilin oktyabrında Xınalıq Dövlət Tarix-Memarlıq və Etnoqrafiya Qoruğunda aparılan təmir-bərpa işləri zamanı Fuad Nagiyev bildirib ki, Xınalıq kəndi dəniz səviyyəsindən 2,200 metr hündürlükdə yerləşir və burada qış sərt keçdiyindən ilin yalnız 4-5 ayında iş aparmaq mümkündür. Bu səbəbdən, təmir-bərpa işlərinin mərhələli şəkildə icra olunması nəzərdə tutulub.
Fuad Nagiyevin açıqlamasında, Xınalıqda tikinti işlləri üçün mümkün hava şəraitinin yalnız may-sentyabr aylarında olduğunu görsədir. Amma tenderlərin niyə sentyabrda keçirildiyi suallar yaradır, çünki sentyabr ayından sonra Xınalıqda tikinti işləri aparmaq mümkün olmur. Beləliklə, tenderlər ilin əvvəlində keçirilməli, maydan işlərə başlanmalı idi. Bu vəziyyət də əlavə araşdırmalara səbəb olmalıdır.
Həmçinin, "MAQRO CONSTRUCTION" MMC-nin Azərbaycanda fəaliyyətinin yalnız bir il sonra dövlət satınalmalarında böyük məbləğlər udması diqqət çəkməkdədir. Bu cür tenderlərin qalibi olan bu şirkətin fəaliyyəti, daha geniş müstəvidə araşdırılmalıdır. Buna görə də, Fuad Nagiyevə verilən sərt töhmət, başqa ciddi cəzalarla əvəzlənə bilər.
